Desenvolverase nos centros socioculturais do Vilariño, os mércores ás 19:00 horas, e no da Ribeiriña os xoves ás 10:00 horas a partir do 15 de maio
A Concellería de Promoción Económica da Pobra do Caramiñal volve apostar polo benestar físico e emocional da veciñanza coa posta en marcha dunha nova edición do curso de exercicio terapéutico baseado no Tai-Chi. As sesións desenvolveranse nos centros socioculturais da Ribeiriña e do Vilariño a partir do vindeiro 15 de maio e prolongaranse ata finais de agosto.
O curso será impartido polo fisioterapeuta e instrutor de Tai Chi Chuan Sergio García. As clases terán lugar os mércores ás 19:00 horas no centro do Vilariño e os xoves ás 10:00 horas no da Ribeiriña, cunha duración dunha hora por sesión. Cada grupo contará cun máximo de dez prazas.
A concelleira Amparo Cerecedo salientou a “boa acollida da edición anterior”, o que motivou esta nova convocatoria, que busca tanto mellorar a saúde da cidadanía como dinamizar os centros socioculturais do rural.
As persoas interesadas poden inscribirse enviando un correo electrónico a participacionvecinhal@gmail.com, indicando nome, apelidos, DNI, teléfono de contacto e o grupo escollido. Só se permitirán dúas inscricións por correo.
