A Oficina Municipal de Turismo ampliará o seu horario de atención facéndoo extensivo durante esta fin de semana. A dependencia municipal abrirá tanto o sábado, 24 de maio, como o domingo, día 25, ante a previsión de centos de visitantes que se desprazarán ao municipio polos tres eventos deportivos que se celebrarán eses días. A instalación permanecerá pechada mañá, xoves 22 de maio, pola festividade local de Santa Rita. O venres, 23 de maio, abrirá no seu horario habitual, de 9.30 a 14.30 horas. En canto ao sábado e o domingo, estará dispoñible en horario de 9.00 a 14.00 horas.
Segundo sinalou o Concello, trátase dunha medida adoptada para atender aos centos de turistas que se prevé recibir durante a fin de semana, que virá marcada por unha intensa actividade deportiva.
Así, o sábado e o domingo, A Pobra será o escenario dos LXXVIII Campionatos de España de Traiñeiriñas, coa participación de 500 deportistas de toda a xeografía.
Eses mesmos días, o estadio da Alta acollerá o Torneo Internacional CONGALSA coa participación de equipos alevíns do Real Madrid, do Betis e do Cádiz.
O domingo, día 25, o municipio será tamén o escenario da Seminifinal do Campionato de Grupos de Show Patinaxe Artística da Coruña Sur.
A instalación
A Oficina de Turismo da Pobra, que conta co distintivo de calidade SICTED, está situada no parque do Castelo, a escasos metros dalgúns dos principais recursos turísticos do concello. O persoal do servizo achega aos visitantes información comarcal e municipal, dándolles todo tipo de material divulgativo sobre as diferentes actividades programadas polo Concello, así como mapas, guías e planos, entre outros recursos.
