A Casa da Cultura Antón Avilés de Taramancos será o escenario a noite do venres 16, ás 20:30 horas, da presentación do libro Galegas na Música, unha obra que pon en valor o papel das mulleres galegas na historia musical do país.
O acto contará coa participación da autora, Isabel Blanco, da ilustradora María Lapido, da presidenta da Asociación Cultural Barbantia, María Xesús Blanco, da editora Edurne Baines e do alcalde de Noia, Santiago Freire Abeijón. A presentación incluirá tamén unha actuación musical a cargo da soprano e violonchelista noiesa Esperanza Mara, que ofrecerá un repertorio vinculado á temática do libro.
Publicado por Belagua, Galegas na Música combina texto e ilustracións para recuperar as traxectorias esquecidas ou pouco coñecidas de mulleres que deixaron pegada no ámbito musical galego, dende a tradición popular ata os escenarios contemporáneos. A obra forma parte das actividades organizadas pola Asociación Cultural Barbantia en colaboración co Concello de Noia, arredor da celebración do Día das Letras Galegas 2025.
O evento servirá tamén como antesala da XIV Romaría das Letras no Barbanza, que terá lugar ao día seguinte no Pazo de Goiáns (Boiro), e que reunirá múltiples actividades arredor da cultura e a lingua galega.
