A pesar das adversas condicións meteorolóxicas deste fin de semana, preto de cincuenta persoas participaron esta mañá na primeira edición da “Andaina das Letras” en Fruíme, Lousame. O evento, organizado polo Concello e a asociación de veciños Zernadas de Castro de Fruíme, busca homenaxear e poñer en valor a vida e obra de Diego Antonio Zernadas de Castro, coñecido como o cura de Fruíme. Ambas entidades levan tempo promovendo que se lle dedique un Día das Letras Galegas.
A marcha saíu puntualmente do adro da Igrexa de Fruíme, liderada por Germán Romero, técnico de Deportes, a concelleira de Cultura, Silvia Agrafojo, e Hermitas Lorenzo e María Regenjo, representantes da AAVV Zernadas de Castro de Fruíme. O percorrido, de menos de cinco quilómetros e dificultade baixa, favoreceu a participación de persoas de todas as idades, desde nenos ata maiores.
Para enriquecer a experiencia, cada 500 metros situáronse láminas informativas sobre a vida e obra de Zernadas de Castro (1702-1777), considerado un precursor do galeguismo. O cura de Fruíme foi un apaixonado defensor da súa terra e da súa cultura, aspectos que quedaron reflectidos na exposición ao longo do itinerario.
A iniciativa foi recibida con entusiasmo polos participantes e reforza o compromiso do Concello e da asociación veciñal por reivindicar a figura de Zernadas de Castro dentro da cultura galega. Desde a organización esperan que este evento axude a impulsar a proposta de dedicar un Día das Letras Galegas á súa memoria.
