A Asociación Folclórica Chorimas de Queiruga (Porto do Son) vainos ofrecer esta fin de semana unha cita coa nosa música e baile tradicional, con motivo de celebrar a chegada (agora si) definitiva da primavera. Trátase da terceira Foliada dos Maios de Chorimas, que está programada para este sábado 3 de maio na Casa da Cultura de Queiruga, organizada dita pola asociación cultural en colaboración co Concello e a Deputación.
A festa comezará polo serán, ás 20.00 horas, cunha Gran Foliada na que actuarán varias agrupacións da comarca do Barbanza: A.C. San Pedro de Carcacía, Rumbia, Ebora, Garridinas, B.M.T. Suevia, As Sivalveiras, Sonelas, A.C. Bailadela, Alixeiras e Rexoubeiriñas.
A Foliada dos Maios rematará ás 22.00 horas cunha gran actuación especial a cargo do vigués Xisco Feijoo, cantante, premiado bailador, coreógrafo, presentador de televisión, mestre da ETRAD e coordinador da sección de canto da OFG SonDeSeu. Ten traballado con artistas de renome internacional como Mercedes Peón, Xosé Manuel Budiño, Carlos Núñez, Kepa Junquera, Berrogüetto e Rodrigo Romaní, entre outros. En 2021 publicou un traballo discográfico, Peixe, que foi un éxito de público e crítica.
