Belén, 25 de decembro, ano 1 da nosa era. Xesús nace nun cortello e, no do lado, vén ao mundo Brais. Así comeza a nova montaxe de Teatro Airiños, A vida de Brais, unha adaptación do filme xa clásico A vida de Brian, do grupo inglés Monty Python. A estrea será no Auditorio de Rianxo cun pase en dúas quendas: sábado 5 ás 20:30 e domingo 6 ás 19:00.
En palabras de Airiños, estamos ante unha comedia “de proporcións case bíblicas”, con moito humor, cancións en directo e un amplo elenco nunha exhibición de personaxes e situacións hilarantes. Unha proposta “digna de calquera teatro romano (ou galego)” dirixida por Amantia Coello e levada a cabo grazas á colaboración da Deputación da Coruña e do Concello de Rianxo.
Airiños comeza agora a xirar esta adaptación do fime do grupo inglés Monty Python, referentes do humor absurdo. Mais continúa representando a súa montaxe anterior As vellas non deben de namorarse. Esta peculiar versión do clásico de Castelao poderase ver no concello de Neda o vindeiro 26 de abril, e en Cerdedo-Cotobade o 11 de maio.
