A deputada de dereitos civís, Soledad Agra; o alcalde de Rianxo, Julián Bustelo; o presidente da Comisión pola Recuperación da Memoria Histórica da Barbanza, Carlos Cimadevila e a madriña, Dolores Rodríguez Sende, participaron esta mañá no acto onde se inaugurou a escultura no antigo campo de concentración Esta xornada está organizada pola Deputación e a Comisión pola Recuperación da Memoria Histórica da Barbanza, coa colaboración do Concello de Rianxo, Nova Escola Galega, O Faiado da Memoria e a Asociación Cultural Barbantia.
As Madriñas Republicanas, “esas mulleres que puxeron humanidade no horror” reciben en Rianxo unha homenaxe da man da Deputación
Rianxo acolleu este sábado un acto de homenaxe ás “madriñas de guerra”, esas mulleres que, en tempos de horror e deshumanización, deron consolo e esperanza a homes privados de liberdade e moitas veces da vida en campos de concentración. O acto foi presidido pola deputada de dereitos civís, Soledad Agra, quen destacou o compromiso e a dignidade de figuras como Dona Dolores Rodríguez Sende, cuxa escultura, obra de Ricardo Dávila, foi inaugurada no antigo campo de concentración da vila.
No evento tamén participaron o alcalde de Rianxo, Julián Bustelo; o presidente da Comisión pola Recuperación da Memoria Histórica da Barbanza, Carlos Cimadevila; e a propia madriña homenaxeada, Dolores Rodríguez Sende. Case un século despois, o lugar que unha vez foi sinónimo de opresión convértese nun espazo de memoria e recoñecemento.
Tras a inauguración, a xornada trasladouse ao auditorio municipal, onde as investigadoras Aurora Marco, Montse Fajardo e María Fernández participaron nun relatorio sobre o papel das mulleres durante a Guerra Civil, o franquismo e a transición. O evento concluíu cun concerto a cargo de Bernal Muíños e o grupo Barahúnda, poñendo música á memoria e á resistencia.
