O Concello de Padrón celebrará o vindeiro martes 6 de maio a tradicional festividade de San Xoán do Raio, unha cita con fonda raíz popular e relixiosa que inclúe actos solemnes, música e un xantar de confraternidade para maiores.
A xornada dará comezo ás 11:45 horas coa recepción oficial das autoridades no Concello de Padrón. Ás 11:55 horas terá lugar a procesión do santo patrón ata a igrexa parroquial de Santiago de Padrón, acompañada polo grupo folclórico Rosalía de Castro.
A continuación, celebrarase unha misa solemne ás 12:00 horas, que será cantada pola Coral Val do Sar, e ás 12:45 horas, a praza Macías acollerá a actuación do dúo de acordeóns Ad Libitum.
O tradicional xantar de confraternidade para maiores de 60 anos celebrarase no Hotel Scala ás 14:30 horas e estará seguido dun animado baile. Para asistir ao xantar será preciso retirar invitación no centro social ata o día 2 de maio e realizar un ingreso de 10 euros, segundo se indica nas oficinas municipais. Ademais, haberá servizo de autobuses desde as 11:00 horas polas paradas escolares, con regreso previsto ás 19:00 horas desde o hotel.
A parte musical continuará pola tarde e a noite no Campo do Souto, cunha actuación do grupo V-Roc ás 20:00 horas, e ás 21:30 horas será a quenda do grupo padronés UYF’75 (Unión y Fuerza), que celebra este ano o seu 50 aniversario.
Desde o Concello de Padrón anímase a toda a veciñanza a participar nesta celebración tan especial, que une devoción, tradición e música para todas as idades.
