O Concello de Muros habilitou un novo equipamento deportivo ao servizo da veciñanza. Segundo fixo saber o Consistorio, as persoas usuarias da pista de pádel de Muros poden facer uso como vestiario da caseta que utilizan no verán os socorristas da praia de San Francisco, en Louro. Trátase dunha instalación cedida por Espina&Delfín a área de Medio Ambiente do Concello, que agora estará dispoñíbel na pista de pádel ata a tempada de praias. A alcaldesa e responsábel da área de Medio Ambiente, María Lago, comentou que é “importante compartir recursos co obxectivo de favorecer á veciñanza”. “Estamos ante un novo servizo demandado polas persoas que xogan ao pádel”, sinalou pola súa parte o concelleiro de Deportes, Damián Torea, lembrando que “as chaves poden recollerse na piscina e deben devolverse tras deixar a pista”.
