O grupo municipal socialista de Rianxo emitiu un comunicado no que critica o formato do pleno municipal e o rexeitamento por parte do Goberno local a varialo para, segundo indicar o PSOE, facelo “máis democrático e igualitario para todos os grupos”. O voceiro socialista, Óscar Rial, sinalou que “o funcionamento actual do pleno dista moito de garantir a igualdade de condicións entre os grupos políticos” e “resulta evidente a constante limitación nas exposicións dos concelleiros e concelleiras, así como a discriminación á hora de permitir réplicas: mentres a uns grupos se lles concede a posibilidade de intervir libremente, a outros córtaselles a palabra”, sinalan, engadindo que “a solicitude formal de aprobación dun Regulamento Orgánico Municipal (ROM), tamén presentada polo noso grupo, é unha mostra inequívoca de que a situación actual non garante un debate real nin unha xestión democrática dos espazos de diálogo político en Rianxo”. Para os socialistas, “o ROM permitiría regular de maneira transparente e xusta o funcionamento dos plenos, evitando arbitrariedades e consolidando unha cultura de respecto institucional”.
Engaden que “ddesde o PSdeG-PSOE de Rianxo consideramos fundamental, con media lexislatura xa avanzada, a celebración dun debate municipal público, que permita á veciñanza contrastar directamente a información e coñecer de primeira man o traballo que se está a desenvolver; por este motivo, levamos máis de seis meses promovendo esta proposta, presentándoa en dúas ocasións, sempre cun enfoque de debate consensuado entre todos os grupos municipais; e precisamente para favorecer ese consenso, o noso grupo evitou facer exposición pública da proposta ata este momento”.
No seu comunicado os socialistas lembran que en 2023 xa se manifestaron a favor da celebración dun debate municipal, a raíz dunha proposta formulada por Rianxo en Común: “A nosa posición daquela foi clara: compartíamos a necesidade de impulsar un debate, mais considerabamos fundamental que fose organizado de maneira equilibrada, garantindo unha xestión compartida entre todos os grupos políticos e non en base a criterios unilaterais. A pesar de que BNG e PP responderon indicando que non ven necesaria esta celebración, insistimos en que sería un exercicio de transparencia imprescindíbel para reforzar a participación cidadá e o control democrático”. Para o grupo socialista, “este debate sería especialmente importante nun contexto no que a comunicación institucional en redes sociais está sendo empregada de maneira manipuladora polo grupo de Goberno, como quedou evidenciado no último pleno”, e engaden, “un exemplo claro foi a promoción de Rianxo durante a Semana Santa, onde se difundiron imaxes de praias supostamente limpas e accesíbeis, cando a realidade era ben distinta: baños públicos sen limpar, accesos sen acondicionar e, o máis preocupante, a rampla de accesibilidade ás praias colocada unicamente para a foto e retirada de inmediato”.
Neste contexto, o PSOE de Rianxo traslada publicamente ao alcalde as seguintes cuestións:
“Por que motivo non se nos deu resposta á solicitude formal presentada para a celebración dun debate público?”
“Ten previsto o alcalde responder a dita solicitude ou promover, dalgunha maneira, un espazo de diálogo público ao respecto?”
