Unha nova proposta presentada polo Partido Popular no Concello de Ribeira insta ao goberno municipal a avanzar na implantación progresiva de Desfibriladores Externos Semiautomáticos (DESA) en instalacións públicas municipais, con especial atención a espazos de gran afluencia como instalacións deportivas, culturais e edificios administrativos.
A iniciativa parte da necesidade de actuar con rapidez ante as paradas cardíacas ou mortes súbitas, que se producen de forma inesperada con máis frecuencia do desexado no noso país, con arredor de 350 falecementos diarios por esta causa. Dado que o 80% destas situacións ocorren na vía pública ou no fogar, a única maneira de garantir unha resposta inmediata é a través do uso dos DESA por parte de persoas próximas á vítima, antes da chegada dos servizos de emerxencia.
Entidades como a Sociedade Española de Cardioloxía apoian a instalación xeneralizada destes dispositivos en lugares públicos, dado que a súa utilización nos tres primeiros minutos tras o paro cardíaco pode incrementar a supervivencia ata un 73%, e en menos de cinco minutos ata o 50%.
A proposta destaca iniciativas pioneiras como Cardio@ngel, posta en marcha recentemente en Ribeira, que combina unha rede de voluntariado con unha aplicación móbil para activar os servizos de emerxencia de forma inmediata. Ademais, fai referencia a un caso real acontecido o pasado mes nos xulgados da localidade, onde grazas á rápida intervención do persoal e da Policía Local, que contaban cun DESA, un veciño logrou recuperar as constantes vitais tras sufrir unha parada cardíaca.
Na actualidade, Ribeira conta con desfibriladores en lugares como o complexo deportivo da Fieiteira, as oficinas de Servizos Sociais, a Policía Local e algunhas escolas, como resultado de campañas como a do CEIP Frións, que logrou adquirir un DESA a través da venda de pulseiras solidarias.
A proposta solicita que no orzamento municipal de 2025 se reserve unha partida específica para continuar coa instalación destes dispositivos, así como para garantir a formación do persoal por profesionais cualificados. Tamén se propón ampliar o número de desfibriladores portátiles dispoñibles nos areais con vixilancia durante a tempada de verán e a bordo dos vehículos do Servizo de Emerxencias.
Como primeiros espazos prioritarios para a implantación, sinalan o Centro da Raqueta, a Casa Consistorial, o Centro Cultural Lustres Rivas-Biblioteca e o Auditorio Municipal, co obxectivo de avanzar cara a unha cidade máis segura e preparada para actuar ante situacións de emerxencia cardíaca.
