O Concello de Boiro, a Escola de Música de Boiro e a Banda Municipal de Música de Boiro xuntaron forzas para organizar o XV Festival de Bandas de Música que terá lugar o sábado 5 de abril ás 19.00 horas no Pazo de Goiáns.
A concelleira de Cultura, María Outeiral, participou na presentación da actividade xunto con Gabriel Riveiro, da Escola de Música de Boiro, e Manuel Romero, da Banda de Música de Boiro.
“Con esta iniciativa buscase recuperar a tradición do festival de bandas e xuntar a antigos membros da Banda de Música”, recoñeceu Manuel Romero. A actividade regular Banda Municipal de Música de Boiro leva parada dende o ano 2020 pero recentemente, gracias á dirección e Lois Pimentel e Juan Pérez, a banda xuntase en algunhas ocasións no ano como é este festival.
Para este acto a Banda Municipal de Música de Boiro contará coa colaboración da Escola de Música de Boiro. “Temos 30 rapaces e rapazas que van colaborar este sábado e acompañarán aos músicos veteranos da Banda de Música”, afirmou Gabriel Riveiro.
Como convidada este sábado estará a Banda de Música de Yeles (Toledo) fundada en 2004 por un ex-membro da Banda Municipal de Música de Boiro, Gustavo Romero. Unha banda con só 18 anos de vida pero que actuou en recitais, concertos e actuacións de diverso tipo en numerosas provincias, sinalaron na presentación do cartel celebrada este 1 de abril no Concello de Boiro.
Alí, a concelleira de Cultura, María Outeiral, animou á veciñanza a achegarse este sábado ao Pazo de Goiáns para desfrutar deste “espectáculo tradicional como é o Festival de Bandas e ver de novo á Banda Municipal de Música de Boiro, un proxecto que están recuperando con moitas ganas e moita ilusión e que agardamos que se consolide cun par de citas anuais”.
