O Museo do Gravado de Artes vai inaugurar o vindeiro 11 de abril, na sala 0 e ás 20.30 horas, unha mostra de Leonardo Rial: Mirar pro fondo.
A exposición, organizada polo Museo do Gravado de Artes (Concello de Ribeira) en colaboración co Taller Experimental de Obra Múltiple Contemporánea de Vilariño (Concello de Cangas) é unha exhibición construída por 11 gravados de grande formato e dúas pezas escultóricas que fundamentan a polisemia do título e a fondura discursiva de Leonardo Rial como artista.
Segundo adianta o Museo do Gravado que dirixe Pastor Rodríguez na parroquia de Artes, o conxunto de obras da colección Mirar pro fondo é unha viaxe a través da memoria, a tradición e a alma mariñeira da ría de Aldán. Cunha mestría singular, traballada ao longo de tres décadas de intensa creación e recoñecementos internacionais, Rial captura nos seus gravados e instalacións a esencia dos recordos dos seus maiores, especialmente os do seu pai. Cada trazo e cada detalle manifestado nas súas obras convídanos a reflexionar sobre a conexión profunda entre o ser humano e o mar que moldea a nosa cultura e os nosos valores.
Asistirán á inauguración o artista gráfico e director do Taller Experimental de Obra Múltiple, Leonardo Rial, a alcaldesa do Concello de Cangas, Araceli Gestido, o presidente da FMAG e alcalde de Ribeira, Luís Antonio Pérez Barral e o vicepresidente da FMAG, Javier Expósito Paradela.
