O Laboratorio Ecosocial do Barbanza impulsa novas xornadas demostrativas centradas na transformación da madeira e o uso de serradoiro portátil. Están organizadas pola Plataforma pola Defensa do Monte en colaboración coa Comunidade de Montes de Leiro, a Comunidade de Montes do Araño e a Comunidade de Montes de Baroña, que cede a peza estrela: un serradoiro portátil Logosol.
A primeira será o martes 22 de abril na Comunidade de Montes de Leiro, e a segunda na Comunidade de Montes do Araño con data aínda por definir, ambas en Rianxo. O serradoiro portátil, da marca Logosol, está cedido pola Comunidade de Montes de Baroña e será o seu persoal quen guíe as demostracións.
Estas xornadas dan continuidade á experiencia realizada en marzo en Baroña (Porto do Son), cun obxectivo claro: promover o aproveitamento local da madeira e explorar alternativas sustentábeis á produción forestal, poñendo en valor os recursos do monte dende unha perspectiva social, ambiental e comunitaria.
A sesión do día 22 incluirá unha demostración práctica do uso do serradoiro portátil, coa participación de 40 alumnos de centros educativos do Barbanza. Pola súa banda, a xornada no Araño espérase que teña un carácter máis aberto e festivo, dirixida á veciñanza e ao conxunto da comunidade.
Ademais das demostracións prácticas e actividades abertas á veciñanza, ofrécese a posibilidade de que particulares ou comunidades transforman a súa madeira no tempo que o serradoiro está en Rianxo. As persoas interesadas poden poñerse en contacto co proxecto para valorar a viabilidade e coordinar a súa participación. Poden escribir un correo a
info@barbanzaecosocial.org para coordinar a súa participación.
Xornada demostrativa de uso de serradoiro portátil en Leiro
Martes 22 de abril a partir das 10h, na praza da Veliña, Lugar de Rañó, Rianxo, 15928 Leiro, A Coruña
Nos próximos días anunciarase a data da xornada no Araño.
O Laboratorio está financiado con fondos europeos grazas ao apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. A coordinación do proxecto do Laboratorio está a cargo da Fundación RIA.
