O Concello de Muros acolleu na mañá deste venres 4 de abril a visita da deputada de plans provinciais e asistencia a municipios, Cristina García Rey, que estivo acompañada da alcaldesa, María Lago; a deputada provincial, Soledad Agra, e parte da corporación municipal. Segundo lembrou a deputada, Muros recibe este 2025 un importe de 862.017,14€ do Plan Único da institución provincial. García aproveitou para visitar unha das obras en execución grazas a estes fondos provinciais.
Cristina García salientou a importancia deste plan para os 93 concellos da provincia, e puxo tamén en valor o esforzo da Deputación, “que prevé investir este ano 125 millóns de euros nos 93 concellos da provincia, mentres que a Xunta destina 116 millóns aos 313 concellos de todo o país, a través do Fondo Galego de Cooperación Local”.
A alcaldesa de Muros, pola súa banda, sinalou que este plan “nos permite investir en obras, pero tamén noutros proxectos que son máis invisíbeis como o gasto corrente”. Amais, puxo o foco nos “gastos asociados a servizos sociais” xa que, no caso de Muros, tal e como afirmou, “axúdanos a asumir os gastos de axuda a asistencia no fogar que é unha competencia impropia que temos asumida os concellos e que se leva unha suma importante do orzamento municipal”. A alcaldesa, ademais, falou dos fondos que destina, con cargo ao Plan Único, “ao mantemento dos servizos de madrugadores, favorecendo a conciliación familiar”, e tamén “á factura da electricidade”. Para rematar, agradeceu á Deputación “a colaboración, e esa flexibilidade que se nos ofrece, xa que é a axuda máis grande que recibimos os concellos”.
A deputada sinalou, ademais que, ademais de promover un impacto positivo na vida da veciñanza, “supón tamén un impulso para a economía local, ao fomentar a contratación de pequenas e medias empresas de construción, enxeñerías e outras de sectores relacionados. Non só se asegura a execución de obras necesarias senón que tamén se axuda a fortalecer o tecido empresarial local, se consolida o emprego e contribúese a fixar poboación”.
