O Concurso de Carteis das Festas de Santo Isidro (Rois) xa ten gañador: trátase do artista Victoriano Trenco Diz, veciño de Padrón, que asinará por segunda vez o cartaz anunciador das ditas celebracións. A ilustración realizada por este alumno de Camilo Seira e das clases de arte municipais foi a elixida por un xurado formado pola pintora, fotógrafa e historiadora da Arte Lara Barreiro; o pintor autodidacta Adrián Hermida; e a concelleira Mercedes Basante. Na foto, posan co cartel gañador.
O Concello de Rois abriu en febreiro a convocatoria para o concurso, unha iniciativa que busca fomentar a creatividade e a participación veciñal, ademais de contribuír á promoción desta celebración tradicional. O prazo para a recepción de traballos estivo aberto ata o venres 11 de abril de 2025. O xurado, composto por expertos no ámbito da arte e do deseño, valorou a calidade artística, a idoneidade como cartel e a capacidade de representación da festividade.
O cartel gañador converterase na imaxe oficial das festas e o seu autor recibirá un premio de 200 euros. Ademais, o traballo premiado pasará a ser propiedade do Concello de Rois, podendo ser reproducido e difundido en distintos soportes de comunicación.
