O Centro Cultural Lustres Rivas acolle a exposición Atadoras, unha mostra fotográfica impulsada polo Concello de Ribeira, a Real e Ilustre Confraría da Dorna e Culturmar que pon en valor o traballo das redeiras, mulleres imprescindibles no mundo do mar e piares fundamentais do noso patrimonio marítimo.
A inauguración contou coa presenza do alcalde de Ribeira, Luís Pérez Barral, quen destacou a importancia desta iniciativa cultural como antesala da XVII Encontro de Embarcacións Tradicionais de Galicia, que terá lugar en xullo na localidade despois de 32 anos.
“Queremos ir quecendo motores para un evento que é moito máis ca unha festa: é unha oportunidade para recoñecer as profesións vinculadas ao mar e sentirnos orgullosos da nosa historia mariñeira”, afirmou o rexedor.
O rexedor agradeceu a José Luis Rodríguez Ruza, autor da mostra, polo seu traballo á hora de capturar, a través da cámara, a esencia dun oficio transmitido de xeración en xeración. “As imaxes que vemos aquí podería dicirse que ata teñen sentimento”, sinalou, destacando que estas fotografías visibilizan a dureza, precisión e paciencia do labor das atadoras.
Na presentación tamén interviñeron a concelleira de Cultura, Antía Alberte; Marcos Buíde en representación da Federación Culturmar e Anxo García en representación da Confraría da Dorna.
Desde o Concello de Ribeira, Dorna e Culturmar convidan á cidadanía a visitar esta exposición e a implicarse nos actos previos ao Encontro de Embarcacións Tradicionais, lembrando que “poñer en valor o traballo das redeiras é tamén dicir alto e claro que o noso patrimonio non é só madeira e velas, senón tamén as mans que fan posible que esas velas naveguen e que as redes pesquen”.
