O Concello de Ribeira está a levar a cabo a pavimentación da céntrica rúa Francisco Lorenzo Mariño, na parroquia de Aguiño. Esta actuación, amplamente demandada pola veciñanza, pon fin a máis de oito anos sen intervencións nesta estrada, que presentaba un avanzado estado de deterioro, segundo sinalou o Concello.
O alcalde e os tenentes de alcalde estiveron este mércores 2 de abril supervisando o desenvolvemento desta intervención que contempla a reposición integral do pavimento, garantindo unha superficie máis segura para a circulación de vehículos e peóns. Ademais, no marco do compromiso do Concello coa accesibilidade universal, estanse instalando pasos de peóns elevados que permitirán un tránsito máis seguro entre as beirarrúas e contribuirán ao calmado do tráfico na zona contribuíndo a salvar vidas e evitar accidentes.
O tenente de alcalde, Vicente Mariño, mostrouse moi contento e satisfeito polo comezo das obras de pavimentación: “Éncheme de orgullo ver o inicio das obras de pavimentación despois de todo o que ocorreu nesta rúa ao longo de tantos anos”. Mariño puxo en valor o traballo do Goberno para que a pavimentación fora unha realidade e deu os parabéns a tódolos veciños e veciñas de Aguiño “xa que era unha obra moi demandada”.
O alcalde de Ribeira, Luís Pérez Barral, destacou a importancia desta obra e lembrou que se está a realizar un investimento forte nas parroquias para dar resposta ás necesidades da veciñanza. “Nos últimos dous anos investíronse 250.000 euros en dotacións básicas para a parroquia, entre as que se inclúen o pavimentado da rúa Francisco Lorenzo Mariño e a renovación da liña de abastecemento, saneamento e pavimentación da rúa Curbelo. Ademais, están en execución ou a piques de comezar outras obras que suman 2 millóns de euros”, sinalou.
Segundo detallou Pérez Barral entre estas actuacións previstas atópanse as pavimentacións das rúas Luís Seoane e Praia da Ribeira con 186.000€, a renovación da liña de auga para consumo na Cerca por 175.000€, a construción da sede do Club de Remo e a renovación do conservatorio de Aguiño que teñen un investimento de 1.000.000€ e 630.000€ respectivamente.
Dende o Goberno local destacan que grazas a estas actuacións a veciñanza desfrutará de servizos básicos renovados e cúmprese co compromiso de investir os fondos públicos nas prioridades das persoas, contribuíndo a gañar servizos públicos pero tamén espazos máis accesibles, seguros e habitábeis para todos os veciños e veciñas.
