O alumnado dos CEIP de Boiro participou nunha plantación de árbores autóctonas nun terreo municipal do monte da Pedreira. A concelleira de Medio Ambiente, Olga González, e o concelleiro Raúl Treus, tamén estiveron presentes nos traballos.
Máis de 160 alumnos participaron na actividade na que realizaron unha plantación de 200 carballos subministrados polo Distrito Forestal e o Concello de Boiro. Para realizar estas tarefas ambientais contouse coa colaboración do alumnado da formación en Repoboacións forestais e tratamentos silvícolas do Obradoiro de Emprego Torre Goiáns IV, ademais da brigada e axentes forestais do Distrito.
