A Praza do Concello de Muros converteuse no epicentro da solidariedade galega cunha emotiva concentración organizada por ADISBISMUR (Asociación de Persoas con Discapacidade da Bisbarra de Muros). Máis de 170 persoas, entre elas alumnado e profesorado do IES As Ínsuas, CEIP Ramón de Artaza e Malvárez e IES Fontexería, uníronse para formar un grande X con paraugas, simbolizando a importancia de apoiar ás persoas en situación de vulnerabilidade.
A concentración tivo lugar ás 12:00 horas no Curro da Praza e foi, en palabras da asociación inclusiva da comarca, “unha auténtica mostra de unión e compromiso”. Durante o acto, a directora de ADISBISMUR, a alcaldesa de Muros (María Lago) e membros do equipo de goberno puxeron voz a un manifesto no que destacaron que a solidariedade é esencial para construír unha sociedade máis xusta e inclusiva.
“Marcar o X Solidario na túa declaración da renda non custa nada, pero cambia moito”, foi unha das mensaxes máis destacadas do evento, reforzando a importancia do compromiso social. O grande “X” formada polos asistentes simbolizou, segundo sinalou a asociación, “o poder transformador da solidariedade e a forza da comunidade cando traballa unida por un obxectivo común”.
ADISBISMUR agradeceu a implicación de todas as persoas participantes e reafirmou o seu compromiso de “seguir loitando por unha sociedade máis igualitaria, inclusiva e comprometida co benestar de todas as persoas”.
