O Concello de Muros acollerá este sábado, día 12 de abril, varias actividades deportivas coincidindo co comezo da Semana Santa.
En, primeiro lugar, a parroquia de Esteiro, en concreto a praia de Somorto, vai dar acollida a un obradoiro de iniciación á pesca submarina. Será ás 10:00 horas e estará impartido por Soraya Hermida, actual campioa Galega e de España da modalidade. O obradoiro, destinado a persoas maiores de 16 anos, inclúe sesións de teoría e de práctica. Lembrar que na I Gala do Deporte do Concello de Muros, Soraya Hermida foi a gañadora na categoría de mellor deportista feminina do ano 2024. Máis información e inscricións: 650 543 519.
Ademais, no polígono industrial da parroquia de Serres celebrarase un KDD Multimarca de Coches desde as 11:00 horas, organizada pola asociación Racing Muros, de recente creación.
Pola noite desenvolverase en Muros unha proba xa contrastada: a Carreira Nocturna dos Calexóns (oitava edición), organizada pola Cuadrilla Pepa a Loba. Será este 12 de abril, con dúas categorías: infantil e absoluta. A saída da absoluta está prevista para as 21.00 dende a pista da Xesta. Inclúe 2,5 quilómetros de percorrido polo centro histórico de Muros.
“Para rematar o día, unha proba moi atractiva que percorre o casco histórico de Muros e onde combinamos deporte con patrimonio”, engade Damián Torea.
