A conselleira de Medio Ambiente e Cambio Climático, Ángeles Vázquez, e a directora xeral de Calidade Ambiental e Sostibilidade, María José Echevarría Moreno, visitaron esta mañá Lousame, onde foron recibidas pola alcaldesa Teresa Villaverde e polo alcalde de Rois, Ramón Tojo, para anunciar a concesión dunha axuda da Xunta destinada á adquisición dun punto limpo móbil que dará servizo a 7.500 veciños entre ambos municipios.
A través dunha achega de 81.000 euros, a Xunta financiará a compra dun camión 100% eléctrico, equipado cunha caixa basculante, grúa de 1.500 kg e capacidade para transportar oito contedores adaptados para a recollida selectiva. Os concellos asumirán o 10% restante e o IVE da actuación, o que supón unha achega conxunta de 27.900 euros.
Durante a visita, a alcaldesa de Lousame agradeceu o apoio da Xunta e destacou a importancia deste servizo para facilitar a correcta xestión dos residuos nas zonas máis afastadas da recollida convencional. “Seguiremos traballando na concienciación cidadá para fomentar a separación de residuos e evitar verteduras incontroladas”, sinalou Villaverde. Pola súa banda, o alcalde de Rois subliñou o compromiso municipal coa protección do medio ambiente e a preservación do rural.
O punto limpo móbil permitirá recoller residuos como papel, cartón, plásticos, vidro, metais, baterías, voluminosos e restos de poda, reducindo as emisións de CO₂ nunhas 7,7 toneladas anuais. Ademais, prevese reducir nun 5% os residuos sen seleccionar no primeiro ano, cun obxectivo de acadar o 15% de redución en tres anos.
Este proxecto enmárcase dentro do plan de axudas da Xunta de Galicia, que este ano destinou 2,6 millóns de euros á mellora e creación de puntos limpos municipais. Ángeles Vázquez destacou que “o éxito da convocatoria obrigou a tramitar unha ampliación de crédito para atender todas as solicitudes que cumprían os requisitos”, demostrando o compromiso do Goberno galego co medio ambiente e a economía circular.
A provincia da Coruña recibiu preto de un millón de euros en subvencións para este tipo de actuacións, sendo a segunda máis beneficiada de Galicia. Ademais, a Xunta investiu este ano case 11 millóns de euros en axudas ás entidades locais para optimizar a xestión de residuos municipais, co obxectivo de avanzar no cumprimento dos obxectivos europeos en materia de reciclaxe e sustentabilidade.
