A cadea alimentaria galega GADIS informou dun investimento de preto de 6 millóns de euros na nova plataforma de Pescarmar, empresa do grupo encargada da selección, compra e xestión de peixes e mariscos. A nova plataforma supón, en palabras do grupo alimentario, “un paso firme no noso crecemento cunha iniciativa deseñada para seguir ofrecendo aos nosos clientes peixe e marisco fresco coa calidade de sempre, reforzando un dos grandes valores diferenciais de GADIS: a atención experta en mostrador e unha experiencia de compra baseada na proximidade, a variedade e o compromiso co produto do mar”.
As funcionais instalacións no Peirao do Leste contan cunha superficie de 4.066 m2, distribuídos en dous andares. Dispón, ademais, de 8 peiraos de carga que suman 697 m2. A nova nave duplica a superficie coa que contaba nas antigas instalacións situadas no peirao de San Diego. A compañía, unha das compradoras de referencia de peixe e marisco no Porto da Coruña, busca con estas instalacións xerar “maior impacto positivo na contorna” reafirmando o seu compromiso cos seus máis de cen provedores locais de produtos do mar e en apoio ao sector pesqueiro.
GADIS engade que a posta en funcionamento desta nave favorece a optimización loxística: “De madrugada empézase a recibir o peixe e o marisco fresco que previamente seleccionaron e adquiriron de forma directa na lonxa os profesionais da compañía. Despois da selección, os corenta e cinco profesionais da plataforma preparan con esmero os pedidos que chegarán pola mañá aos distintos puntos de venda. Así, o peixe e marisco fresco pasa da lonxa ao mostrador en poucas horas, atendendo as necesidades de cada tenda e fomentando o consumo de produtos do mar de orixe galega en Galicia e en Castela e León. Este modelo permite, ademais, trasladar ao cliente vantaxes moi claras en prezo, frescura e calidade”.
O grupo explica tamén que a nave foi deseñada seguindo “altos estándares de sustentabilidade ambiental e unha coidada integración arquitectónica na súa contorna portuaria”. A maiores, priorizouse o aproveitamento da luz natural e o uso de materiais sostíbeis e resistentes, adaptados ás condicións propias da súa proximidade ao mar. As instalacións incorporan tecnoloxía de vangarda, “con sistemas de control de calidade avanzados e refrixeración por CO₂, unha opción máis respectuosa co medio ambiente, e ademais conta con placas fotovoltaicas para autoconsumo, iluminación LED e sistemas de control de presenza e intensidade, o que permite reducir o consumo enerxético nun 40% fronte a sistemas convencionais”.
Á moderna plataforma de compra e distribución, que xa está en funcionamento no Porto da Coruña, súmase a de Vigo e a plataforma de redistribución de Valladolid. “Estas”, engade GADIS, “permiten axilizar os tempos de repartición e garantir a máxima frescura nos puntos de venda”. Alén de todo isto, “preto de cen profesionais especializados traballan cada día para asegurar que o peixe e marisco chegue nas mellores condicións, maioritariamente desde as principais lonxas e portos de Galicia, un esforzo constante que levou á Organización de Consumidores e Usuarios (OCU) a recoñecernos como a empresa co mellor peixe do sector en España”, explican dende GADISA.
