Familias e asociacións do Concello de Muros veñen de facer pública a súa profunda preocupación pola grave situación de desatención pediátrica que afecta aos concellos de Muros e Carnota dende hai case un ano. Segundo denuncian, a praza dun dos pediatras da zona leva dez meses sen cubrir tras unha baixa médica, o que obriga a unha soa profesional a facerse cargo de arredor de 900 nenos e nenas, unha carga asistencial que consideran “insostible”.
Esta situación non só afecta á calidade asistencial, senón que tamén limita o acceso ao sistema sanitario, xa que as familias asignadas ao pediatra ausente non poden empregar a app Sergas Móbil para pedir cita, tendo que recorrer ao teléfono e dependendo da dispoñibilidade da axenda da única pediatra en activo.
Ademais, cando esta profesional está ausente, a cobertura redúcese a un horario parcial de 8:00 a 12:00 horas, sen garantir a atención ao longo de toda a xornada nin todos os días. Fóra deste horario, os menores de máis de 3 anos son derivados ao médico de familia, mentres que os de entre 0 e 3 anos deben desprazarse ao centro de saúde de Outes —se se chega antes das 12:00h— ou ao de Noia.
A situación empeora durante o verán, cando o incremento de poboación non vai acompañado dun reforzo dos servizos sanitarios, o que fai aínda máis crítica a falta de recursos.
As familias tamén denuncian que non existe atención pediátrica en horario de tarde, e que, ante situacións de urxencia, deben desprazarse ao hospital de referencia situado a 70 km, unha distancia que consideran “inabordable” e que supón unha discriminación territorial grave.
Ante este panorama, reclaman con firmeza a cobertura inmediata da praza vacante, así como a dotación de medios humanos e materiais que garantan unha atención pediátrica digna e continua.
“Non podemos seguir tolerando esta precariedade asistencial”, sinalan. E lanzan un chamamento ás autoridades sanitarias para que actúen con urxencia e responsabilidade: “As nosas crianzas merecen unha sanidade pública de calidade e accesible. É hora de poñer fin a este abandono institucional”.
