Un home perdeu a vida esta madrugada na Rúa de Barreiro, na parroquia de Palmeira, no concello de Ribeira, ao ser atropelado polo seu propio coche, que quedara sen freos.
O suceso tivo lugar arredor das 02:20 horas, cando un particular contactou co Centro Integrado de Atención ás Emerxencias 112 Galicia para alertar de que atopara a un home debaixo dun vehículo. Segundo indicaban xa na chamada, a vítima podería estar falecida.
De inmediato, desde o 112 Galicia mobilizáronse os medios necesarios, informando ao Servizo de Urxencias Sanitarias de Galicia-061, ao GAEM e Bombeiros de Ribeira, así como aos axentes da Policía Nacional e da Policía Local.
Unha vez no punto, os equipos de emerxencias confirmaron o falecemento do home, sen que se puidese facer nada por salvarlle a vida. Segundo a información recollida, o falecido era o propietario do vehículo, que aparentemente sufriu un fallo nos freos e acabou atropelándoo.
