O Concello de Boiro e a Asociación Creaturas celebran o vindeiro sábado 3 de maio a 12ª edición do Maio Vintage Market. A concelleira de Cultura, María Outeiral, participou este xoves 24 de abril na presentación do evento xunto con Daniel García, membro da organización e presidente da ABE; e Alberto García, membro da organización e técnico de cultura.
Segundo confirmaron, van participar nesta edición máis de 70 postos de artesanía e tamén entidades e asociacións como Ambar, Cruz Vermella, Turbina… e que contará cunha programación cultural en diversas localizacións de durante todo o día. “Con esta actividade dá comezo o programa cultural do verán con eventos organizados por entidades e asociacións que se prolongan durante toda a época estival”, recoñeceu María Outeiral.
A programación comezará ás 11.30 horas cunha batucada polas rúas de Boiro e continuará durante todo o día cos DJs Señora DJ, DJs Maruja e Coralia, DJs Baño Txeku, DJ Gafapasta e DJ Matrek. Haberá tamén programación infantil con Brais das Hortas e Marta Ortiz e actuacións de French Riviera ou David LH & The Po’Boys. “Esta festa, que é unha adaptación da festa dos maios, mostra a viveza de Boiro”, sinalaron.
A temática deste ano será os anos 90 e 2000 polo que dende a organización animan a todo o mundo a que se caracterice de época. “Trátase dunha festa moi participativa que mestura comercio local, cultura, artesanía… na que se involucra a veciñanza e tamén os negocios do municipio”, afirmou Daniel García.
