Este xoves 10 de abril ás 19:30h celebrouse no Auditorio Municipal de Rianxo a entrega de premios das persoas gañadoras na sétima edición do circuíto de probas populares da Mancomunidade Barbanza Arousa. Entregaranse premios ás distintas categorías gañadoras nos circuítos celebrados nos catro concellos que abrangue a mancomunidade e que pertencen á vertente sur do Barbanza: A Pobra do Caramiñal, Boiro, Rianxo e Ribeira.
Os premios a entregar foron ás categorías absolutas, sub-10, sub-12, sub-14, sub-16, sub-18, sénior, grupos máster femininas e masculinas, clubs federados e asociacións, e á categoría de conciencia social destinada a persoas con diversidade funcional, sapatilla inclusiva.
O acto estivo conducido polo xornalista deportivo Terio Carrera e contou coa intervención da monologuista galega Leti da Taberna.
Nesta edición os trofeos entregados estaban realizados nun material de plástico reciclado, en consonancia coa estratexia global da mancomunidade de fomento da sustentabilidade en todos os eidos.
O Circuíto de Carreiras Populares Barbanza Arousa (4 carreiras, 1 meta) ten por obxectivo fomentar a práctica da actividade física como medio para alcanzar unha vida máis saudábel. O Circuíto conta co control técnico da Federación Galega de Atletismo e estivo organizado conxuntamente polos concellos que forman parte da Mancomunidade Barbanza Arousa: A Pobra do Caramiñal, Ribeira, Rianxo e Boiro.
