Augas de Galicia vén de supervisar e comprobar o resultado das obras de saneamento desenvolvidas na Gardiña, no núcleo de Acea (Serres). Como lembraremos, o Concello desenvolveu nesta contorna unha actuación para implantar a rede de saneamento municipal, obras que remataron o pasado mes de febreiro. “Tratábase dunha demanda histórica da veciñanza da Gardiña”, lembrou a alcaldesa de Muros, María Lago, trala visita dos técnicos de Augas de Galicia destinada a comprobar o resultado dos traballos, que recibiron o seu visto e prace e salientaron o valor medioambiental do proxecto, xa que esta nova rede de saneamento instalada polo concello elimina varios puntos de vertidos ao mar. “Os traballos incluíron ademais a renovación do firme, mellorando a seguridade viaria”, engade a concelleira de Obras, Laura Rivadeneira.
