O Laboratorio Ecosocial do Barbanza organiza outra xornada de voluntariado para a eliminación de acacia en Rianxo: unha actividade coordinada pola Fundación Montescola. Desta vez, será nos terreos do monte veciñal do Araño (Rianxo), en colaboración coa CMVMC de Araño e a Asociación Cultural A Carballeira de Baia. A cita será este sábado 12 de abril ás 10.00 horas. O punto de encontro está fixado no Campo da Festa do Araño
A actividade coincidirá coa xa tradicional Festa da Salchicha, que comezará ao rematar o voluntariado, tamén no Souto. O programa inclúe degustación de salchichas, actuación dos gaiteiros Os Pequenos do Barbansa, xogos populares, bingo e baile para todos os públicos.
Como dixemos, a actividade está coordinada por Montescola, entidade responsábel das accións de educación ambiental, voluntariado e dinamización comunitaria no marco do Laboratorio Ecosocial do Barbanza. Contará ademais coa colaboración da Comunidade de Montes do Araño, propietaria dos
terreos, e da Asociación Cultural A Carballeira de Baia, encargada de dar continuidade á xornada cunha proposta festiva aberta a toda a veciñanza.
A xornada está aberta a persoas de todas as idades e ten como obxectivo concienciar sobre o impacto das especies invasoras, contribuíndo á recuperación ecolóxica do monte. Ao finalizar o traballo, as persoas voluntarias serán convidadas a un xantar de albaroque, seguido de música
tradicional, xogos populares e baile no Souto de Buía (antiga escola).
O Laboratorio está financiado con fondos europeos grazas ao apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. A coordinación do proxecto do Laboratorio está a cargo da Fundación RIA.
