A Gala da Cultura da Deputación da Coruña chega este xoves 10 de abril, no Teatro Colón ás 19 horas, á súa cuarta edición para converterse un ano máis no escaparate da creación galega e xa consolidada como “unha cita imprescindíbel onde teñen visibilidade e recoñecemento o traballo e o talento de artistas, músicos e músicas, escritores e escritoras, colectivos e proxectos culturais da provincia”, en palabras da institución provincial.
Ao escenario do Colón subirán para recibir o seu galardón, deseño da escultora Soledad Penalta, as gañadoras e gañadores dos premios convocados polo departamento provincial de Cultura en 2024: o Torrente Ballester de narrativa, o Castelao de banda deseñada, o Raíña Lupa de literatura infantil e xuvenil, o González Garcés de poesía, o Antonio Fraguas de artesanía, o Fran Pérez ‘Narf’ de música, o Begoña Caamaño á acción cultural pola igualdade de xénero, o Jesús Núñez de arte gráfica e o Luís Ksado de fotografía.
Moi en sintonía cunha acción cultural da Deputación que quere tecer redes con toda a súa programación, o novo tradicionalismo –a reinterpretación e revitalización da cultura e as tradicións galegas desde una perspectiva contemporánea e innovadora– será o fío condutor da gala. Presentaraa a xornalista Susana Pedreira, coa colaboración dunha intérprete de lingua de signos, nunha velada con dirección artística de Thais Suárez, música de Alana, danza da compañía do bailarín e coreógrafo ribeirán Fran Sieira, imaxe audiovisual de Nela Fraga –que participa cunha peza audiovisual creada a partir de imaxes do Arquivo do Patrimonio Oral da Identidade do Museo do Pobo Galego– e deseño de roupa de La Mapache e de José Matteos.
Especial protagonismo terá o encaixe de Camariñas, presente no escenario, no vestiario, en todos os elementos gráficos da gala e no vestíbulo do Colón, onde palillarán artesas da Mostra a partir das 18 horas.
A entrada é libre e o público está convidado a pasar polo fotocol desde as 18.30, hora da apertura de portas.
Os premiados
- Torrente Ballester de narrativa: Maria Dolores Rodríguez (en lingua galega) Jose Antonio Bonet (en lingua castelá).
- Castelao de banda deseñada: Sandra López (modalidade xeral) e Laura Suárez (modalidade LIX).
- Raíña Lupa de literatura infantil e xuvenil: Érica Esmorís (modalidade infantil) e Rosa Aneiros (modalidade xuvenil).
- González Garcés de poesía: Gonzalo Hermo.
- Antonio Fraguas de artesanía: Borja Canedo (modalidade tradicional) e Ezequiel Franchi (modalidade contemporánea).
- Fran Pérez ‘Narf’ de música: Carabela.
- Begoña Caamaño á acción cultural pola igualdade de xénero: María Encarnación Otero (premio á traxectoria) e Asociación Andar cos tempos (premio á iniciativa).
- Jesús Núñez de arte gráfica: Jose Andrés Santiago.
- Luís Ksado de fotografía: Vicente Fraga.
