Este 2 de abril, a Asociación Boirense de Empresas (ABE) presentou na súa sede o renovado Catálogo de Premios, que, segundo indicou a dirección da patronal, “chega cunha gran variedade de agasallos e cun balance récord de participación”.
O sistema de fidelización da ABE conta con máis de 4.200 usuarios activos, 33.820 tíckets rexistrados en 2024 e mais de 9.000 no que vai de 2025, “o que reflicte o crecemento e o compromiso da clientela co comercio local”, informou a asociación, engadindo que ao longo de 2024 entregáronse 371 premios, mentres que no primeiro trimestre de 2025 foron trocados 142, “o que confirma a eficacia do sistema para incentivar o consumo e premiar a fidelidade”. Estes números, engadiu a patronal, “evidencian que o sistema está a ter un impacto real na dinamización económica do municipio e no fortalecemento das pequenas e medianas empresas”.
Para quen non o saiba, o sistema de fidelización da ABE está aberto a todas as persoas que realicen compras nos máis de 200 negocios asociados e permite acumular o 10% do importe das compras en puntos, que logo poden cambiarse por bonos ABE para utilizar non negocios ou por premios como maletas de viaxe, reloxos intelixentes, auriculares sen fíos e moito máis.
Promoción especial de lanzamento e evento de primavera
O lanzamento do novo catálogo está integrado na campaña de primavera e como promoción especial os rexistros realizados o venres e sábado acumularán o dobre de puntos.
A campaña de primavera terá o sábado 5 de abril un gran evento nas rúas de Boiro. A ABE sacará a rúa a súa Ruleta de Premios, os clientes que realicen durante o venres e sábado compras superiores aos 10€ terán a oportunidade de gañar premios e recibir unha bolsa de flocos de millo. Cada tícket de máis de 10€ permitirá unha tirada na ruleta que ten premios como cuncas, imáns, abre botellas ou ambientadores para o coche.
A ruleta e o posto de flocos estarán situados na rúa Santos Mieites de 18.00 a 21.00 hs.
Ademais, como fin de campaña, o luns 7 de abril, ABE realizará un sorteo especial entre todos os clientes que rexistraron os seus tíckets de compra entre o 24 de marzo e o 6 de abril. O premio consistirá nunha paga mensual de 100€ ata finais de ano.
Daniel García, presidente de ABE, subliñou que o programa está pensado para premiar a fidelidade dos clientes e dinamizar o comercio local: “Este programa é unha maneira de agradecer aos nosos clientes e de seguir apoiando as nosas empresas. O crecemento continuo da participación demostra que estamos no camiño adecuado. So hai que ver os datos xa que na primeira semana da campaña de primavera rexistráronse 791 tíckets, para o sorteo da paga mensual, un 25% mais que na anterior semana”.
Pola súa banda, Gabriel Alén, director xeral de Comercio, destacou a importancia desta campaña para o fortalecemento do comercio de proximidade: “O programa de ABE é unha gran oportunidade para que os consumidores se conecten cos negocios locais; non só premian a fidelidade, senón que tamén contribúe á dinamización da economía local, un aspecto fundamental para o crecemento e benestar da nosa comunidade”.
Na presentación tamén participou José Ramón Romero, alcalde de Boiro, quen resaltou a relevancia deste tipo de proxectos para a dinamización económica do municipio. Romero indicou: “O apoio ao comercio local é esencial, e esta iniciativa contribúe de xeito directo a fortalecer as nosas empresas e mellorar a calidade de vida na nosa vila”.
Compromiso coa economía local
A ABE lembrou que iniciativas como esta son fundamentais para “fomentar o consumo local, recompensando a confianza da clientela e mantendo o tecido empresarial activo”.
Recordou tamén que toda a información sobre o programa, listado de empresas e o catálogo de premios está dispoñíbel na páxina oficial de ABE.
O programa conta coa financiación da Xunta de Galicia e a colaboración do Concello de Boiro.
