Este venres 4 de abril celebrouse a presentación oficial do Plan Estratéxico do Comercio de Galicia 2025-2030. A cita foi na Cidade da Cultura en Santiago de Compostela e nela participaron, achegando os detalles do Plan (a folla de ruta da innovación autonómica para impulsar e reforzar a actividade do sector), o conselleiro de Emprego, Comercio e Emigración, José González, e o director xeral de Comercio e Consumo, Gabriel Alén. Tamén acudiron as patronais da comarca do Barbanza, incluída a a Asociación Boirense de Empresas (ABE), que tivo parte activa nas mesas de traballo previas ao evento de presentación, nas que se elaborou o plan e se achegaron propostas específicas do comercio local. Estas xornadas de traballo foron “clave” para que a ABE puidese trasladar as necesidades e opinións do comercio de proximidade, contribuíndo “ao desenvolvemento dunha estratexia adaptada aos retos e á realidade dos pequenos e medianos negocios galegos”, destacaron dende a directiva da patronal boirense.
O plan, cun orzamento de 320 millóns de euros, busca impulsar a modernización e competitividade do comercio galego, e aborda áreas clave como a creación dunha marca do comercio galego, a revitalización das contornas comerciais urbanas e a mellora da experiencia de compra para os consumidores. A ABE considera que este “plan permitirá aos seus comercios asociados adaptarse mellor aos novos retos que impón a dixitalización e os cambios nos hábitos de consumo, ao tempo que fortalece o sector no seu conxunto”.
A ABE tamén se compromete a manter informados aos seus comercios asociados sobre a execución do plan, “asegurando que todos poidan beneficiarse das oportunidades que se presenten”. Neste sentido, a patronal boirense anunciou que vai “participar activamente na execución do plan, traballando de maneira conxunta coas administracións e co resto de entidades do sector para que as accións previstas se implementen de forma eficaz”.
Para a asociación, outro dos eixes clave do plan é “o fomento da mocidade no comercio, a través de iniciativas como Localízate, que buscan achegar aos mozos e mozas ao comercio de proximidade”.
A ABE reafirma o seu compromiso co comercio local e coas iniciativas que “poidan fortalecer e dinamizar os negocios asociados, co obxectivo de garantir que o comercio de proximidade siga sendo un piar fundamental na economía galega”.
Os interesados en ler o Plan Estratéxico do Comercio de Galicia 2025-2030 en detalle poden facelo a través da ligazón habilitada na Rede.
