A contadora Sole Felloza vai estar este venres 28 de marzo no concello de Boiro, no Centro Social de Abanqueiro, para ofrecer un espectáculo destinado ao público infantil e familiar. Trátase da función Acender a noite. As entradas estarán dispoñíbeis na billeteira dende unha hora antes da función. A cita será ás 20.00 horas.
A galego-uruguaia Soledad Felloza dedícase á narración oral desde hai 25 anos. Tamén é docente, actriz, fotógrafa, escritora de literatura infantil e xuvenil e dramaturga, e conta cunha ampla formación no eido do teatro e no eido dos contos. Recibiu o Premio Europeo ao mellor conto para nenos e nenas por A cociñeira do rei (Editorial Oqo). O seu programa de radio La casa disparatada foi declarado pola UNESCO de interese por mor da súa contribución á difusión dos dereitos da nenez. Ten editados discos de contos para nenos baixo o titulo De Tin Marín, esgotados neste momento.
Acender a noite é unha obra para público infantil que achega á rapazada aos contos para alumear a escuridade coas palabras brillantes que constrúen mundos novos e, ao mesmo tempo, serven para camiñar no noso.
