Sinerxia Consultora, con sede en Ames, vai impulsar un proxecto de gran potencial para impulsar a inserción laboral e a formación no sector pesqueiro: o proxecto PESCA-HAB (Capacitación para a sustentabilidade na xestión pesqueira), seleccionado dentro da convocatoria de axudas do Programa Empleaverde e aprobado cunha subvención de 174.003,83€ que levará a cabo entre os anos 2025 e 2026. O seu principal obxectivo é impulsar a capacitación e a contratación de persoas desempregadas no ámbito da xestión pesqueira sostíbel.
PESCA-HAB desenvolverase en Galicia e Andalucía co obxectivo de formar a persoas desempregadas en xestión pesqueira, cun enfoque específico en sustentabilidade e análise de datos para fortalecer a conservación da biodiversidade mariña. A formación será híbrida, combinando sesións presenciais e en liña, adaptándose ás necesidades dos participantes. O proxecto está dirixido a profesionais e recentemente graduados en disciplinas relacionadas coa sustentabilidade como ciencias ambientais, sociais e económicas, análises de datos e Big Data, así como a persoas con experiencia nestes eidos, especialmente en áreas como análises de datos, estatística e informática.
A iniciativa enfócase en capacitar ás persoas desempregadas en dúas ocupacións prioritarias: especialistas en sustentabilidade e biodiversidade mariña, e especialistas en investigación de recursos naturais e ecosistemas acuáticos.
Sinerxia lembra que segundo un estudo da Fundación Biodiversidade, estas ocupacións foron identificadas como altamente demandadas dentro do Eixo Prioritario Pesca e Acuicultura Sostibles (BIO6).
Ademais, PESCA-HAB contempla a contratación de dúas persoas ao finalizar a formación, unha en Galicia e outra en Andalucía. Un dos perfís será en sustentabilidade e o outro en análise de datos, co obxectivo de optimizar a xestión pesqueira. “Isto”, explican dende a empresa de Ames, “permitiranos mellorar os nosos servizos na xestión de datos e sustentabilidade, e ofrecer un soporte máis especializado aos seus principais clientes”.
Con este proxecto, Sinerxia Consultora reforza o seu compromiso coa sustentabilidade no sector pesqueiro e contribúe á creación de emprego, ofrecendo unha formación que apoia a transición cara a prácticas pesqueiras máis responsables e respectuosas co medio ambiente. Grazas ao apoio do Programa Empleaverde e a colaboración coa Fundación Biodiversidade, PESCA-HAB posiciónase como unha oportunidade para mellorar a empregabilidade nun sector crucial para a economía e a biodiversidade.
