Os bombeiros do parque Provincial de Boiro acudiron a socorrer unha saída de vía dun vehículo no que había unha persoa atrapada. O sinistro localizouse no punto quilométrico 63 da AC550, en Serra de Outes (concello de Outes).
A persoa foi liberada do vehículo e posteriormente trasladouse polo parte do 061 ao hospital.
Completaron o operativo a Garda Civil de Tráfico, a Policía Local de Serra de Outes, O GES de Noia, e o 061.
O 112 Galicia tivo constancia do accidente arredor das 11:20 horas desta mañá, momento no que un particular informou dunha saída de vía no quilómetro 63 da AC-550. O alertador tamén indicou que o turismo quedara envorcado e cunha persoa ferida no seu interior.
Decontado, os xestores do 112 Galicia solicitaron a intervención do Servizo de Urxencias Sanitarias de Galicia-061, dos Bombeiros de Boiro, do GES de Noia, da Garda Civil de Tráfico e da Policía Local.
A muller implicada, incapaz de saír do coche, precisou da axuda dos membros do GES, pois foi necesario o uso do material de excarceración para liberala. Pola súa parte, a dotación de bombeiros colaborou na limpeza da vía.
