O Concello de Muros informou á veciñanza do remate das obras de aglomerado e renovación do pavimento nas Laxas, na parroquia de Louro. Os traballos melloran a accesibilidade da zona e os desprazamentos das persoas de mobilidade reducida.
“Cando chegamos ao Concello, atopamos unha rede de vías e camiños nas parroquias en mal estado de mantemento, polo que este tipo de actuacións son unha prioridade para o goberno local”, asegurou a alcaldesa de Muros, María Lago, engadindo que “somos conscientes das necesidades de todas as parroquias e, no caso de Louro, esta era unha obra moi demandada”.
Pola súa banda, a concelleira de Obras, Laura Rivadeneira, sostivo que “estes traballos nas Laxas eran necesarios porque o estado do camiño era moi deficiente”. “Con esta renovación, melloramos a seguridade viaria e facilitamos o acceso ás vivendas á veciñanza da zona”.
Os traballos de renovación da rede de estradas e camiños de Muros continuarán por todo o concello ao longo do ano.
