A tenente de alcalde de Porto do Son, María Maroñas, xunto á concelleira Magdalena Pérez, que acudiu en calidade de parlamentaria, estiveron presentes este xoves 20 de marzo na duodécima gala de entrega de Premios Down Compostela, organizada por esta entidade. A sala Mozart do Auditorio de Galicia, en Santiago de Compostela, acolleu esta gala na que os galardoados nesta edición foron a psicóloga Marta Rodríguez Lorenzo, o catedrático Antonio Rodríguez Núñez e a empresa Seur Geopost.
Porto do Son, integrador e solidario
Desde este venres 21 de marzo e durante toda a fin de semana, a estacada da fachada marítima do municipio sonense lucirá coas cores azul e amarelo, en conmemoración do Día Mundial da Síndrome de Down e para dar máis visibilidade ás persoas con esta síndrome, defender os seus dereitos e crer nas súas posibilidades.
