Madrid acolleu unha nova edición do LVII Capítulo da Orde da Vieira, un evento de referencia para a comunidade galega no exterior. O secretario xeral da Emigración, Antonio Rodríguez Miranda, participou nesta celebración que cada ano congrega centos de persoas de distintos ámbitos profesionais e lugares do mundo para exaltar a identidade e as tradicións de Galicia.
Durante o acto, tivo lugar a investidura de novos cofrades, entre os que destacaron Pablo Fernández, secretario xeral de Emprego e Relacións Laborais, e Luis E. Ramos, director da Casa de Galicia en Madrid. Ademais, entregáronse os premios Madrigallegos de Ouro e os Trofeos Galeguidade no Mundo, que recoñecen a traxectoria e contribución de personalidades e entidades á proxección e prestixio de Galicia.
No seu discurso, Rodríguez Miranda resaltou o labor da Orde da Vieira como espazo de encontro da galeguidade universal e felicitou aos premiados. En especial, tivo palabras de lembranza para Xosé Luís Blanco Campaña, homenaxeado este ano, a quen destacou como unha figura clave na comunicación e cultura galega, evocando ademais as súa contribucións musicais na televisión.
O secretario xeral animou aos asistentes a continuar promovendo o nome de Galicia alí onde se atopen, subliñando o papel integrador da Orde da Vieira e a importancia do sentimento de pertenza que transcende fronteiras. O acto pechouse coa lembranza ao himno da Orde, reafirmando que a galeguidade é un lazo que une a todos “de Galicia e para Galicia, por Galicia e por amor”.
Premiados na edición 2025
Os premios Madrigallegos de Ouro foron entregados a:
- Antonio Palacios Ramilo (a título póstumo) polo seu mérito empresarial.
- José Manuel Otero Lastres polo seu mérito xurídico.
- Francisco García Rio polo seu mérito na sanidade.
- Carmen Andrade Perdrix polo seu mérito no servizo público.
- Ángel Peláez Poyán polo seu mérito na comunicación.
Os Trofeos Galeguidade 2025 foron outorgados a:
- Xosé Luís Blanco Campaña.
- Instituto de Investigacións Sanitarias de Santiago (IDIS).
- Revista La Catedral de Santiago, dirixida polo sonense, Adolfo Enriquez
Finalmente, a Vieira de Honra á calidade artística foi concedida a Manoele de Felisa.
