O Concello de Porto do Son, a través do seu alcalde Luis Oujo, avanzou algúns detalles sobre o proxecto para construír unha residencia para persoas maiores no termo municipal que, de igual xeito que os demais concellos do Barbanza e de Galicia, presenta uns índices demográficos de poboación cada vez máis avellentada. Segundo confirmou o rexedor, a Consellería de Política Social está a estudar tres alternativas para o seu emprazamento.
Un deles, tal e como se vén informando dende hai meses, é o colexio-fogar da Tarela, que é propiedade do Arcebispado de Ourense e que cesou a súa actividade regular en 2007. Este inmóbel ten un importante potencial para albergar a residencia de maiores (por situación, por amplitude das instalacións, pola gran superficie que ocupan os seus espazos de lecer, contando cunha parcela de máis de 30.000 metros cadrados), pero o seu elevado prezo de máis de 3 millóns de euros preséntase como un importante obstáculo para as arcas públicas.
Outra das opcións sería a estrutura de vivendas sen rematar da contorna do Outeiro mercada polo Concello cunha axuda do Instituto Galego de Vivenda e Solo (IGVS), que se ben foi tido en conta como posíbel sede do novo Centro de Saúde, desbotouse logo polos problemas de accesibilidade e de funcionalidade que podía presentar para os usuarios do Centro.
A terceira opción serían unhas parcelas situadas na zona de Xío, Noal.
Porto do Son conta cun Centro de Día que, segundo confirmou o alcalde, estaría ao cen por cen e que de feito “precisaría máis prazas” pola alta demanda que presenta. O rexedor tamén salientou a idoneidade de colaborar dende as administracións (o Concello, a Consellería de Política Social) e a empresa que, segundo confirmou, está interesada en impulsar e xestionar a residencia de maiores de Porto do Son.
