O Grupo Municipal do PSdeG-PSOE de Rianxo compartiu un comunicado crítico coa seguridade dos parques públicos do concello, onde, sinalan, precísanse melloras en iluminación. “Levamos máis dun ano insistindo neste asunto sen que, ata o momento, fosen adoptadas solucións efectivas para garantir a seguridade e o benestar da veciñanza que fai uso destes espazos”, sinala Óscar Rial, voceiro do PSdG rianxeiro, engadindo que “de xeito particular, solicitamos unha intervención inmediata no parque do Campo de Arriba en Rianxo e no parque de Campos de Pazos en Taragoña, que presentan unha evidente carencia de iluminación, xerando situacións de inseguridade para os seus usuarios, especialmente nas primeiras e últimas horas do día”.
Os socialistas sosteñen que “esta deficiencia non só afecta ás crianzas que frecuentan os parques, senón tamén ás súas familias e a toda a cidadanía que emprega estas zonas de lecer; ademais consideramos fundamental realizar unha revisión integral do estado dos parques no conxunto do termo municipal, tanto no relativo á iluminación como ao mantemento e conservación xeral das instalacións, garantindo que todos os espazos públicos cumpran coas condicións axeitadas de seguridade e accesibilidade”.
Para o PSOE, resulta “incomprensíbel que tras máis dun ano de reclamacións e advertencias por parte do noso grupo, o Goberno municipal continúe sen adoptar medidas concretas para solucionar este problema”.
O grupo reclama ao Executivo os seguintes puntos:
Que proceda á instalación de iluminación suficiente nos parques de O Campo de Arriba en Rianxo e de Campos de Pazos en Taragoña.
Que realice unha inspección técnica de todos os parques públicos do municipio para avaliar as necesidades de mellora na iluminación e no estado xeral das infraestruturas.
Que elabore un plan de actuación con prazos concretos para solucionar estas carencias e garantir o dereito da veciñanza a gozar de espazos públicos seguros e ben acondicionados.
