Os socialistas de Rianxo, a través do seu voceiro Óscar Rial, compartiron un comunicado no que acusan ao Executivo local de “bloquear a transparencia na xestión das subvencións municipais”, votando en contra da proposta do PSOE para modificar a Ordenanza Reguladora de Subvencións e as Bases de Execución Orzamentaria do Concello, unha decisión que “pon freo ao control democrático”, sinala o grupo do PSdG, que lembra que malia todo “a moción foi aprobada grazas ao apoio do BNG e a abstención do PP no pleno”. Explican que a proposta socialista estaba baseada en principios de “boa gobernanza, transparencia e eficiencia na xestión dos recursos públicos”, aliñándose coas normativas vixentes, como a Lei Xeral de Subvencións, a Lei de Bases de Réxime Local e o Real Decreto sobre o control interno no sector público local. O obxectivo era “garantir que os fondos municipais destinados a subvencións respondesen ao interese xeral e fosen xestionados con criterios de equidade e responsabilidade”.
Para o grupo socialista, a negativa do Goberno local a apoiar estas medidas “pon en evidencia a súa falta de compromiso cunha xestión transparente e participativa dos recursos municipais”.
O PSOE de Rianxo considera “inaceptábel que se manteña un sistema opaco no que as decisións sobre subvencións poidan ser tomadas sen o necesario control do pleno, o órgano que representa a totalidade da veciñanza”.
O Partido Socialista di que o Goberno local “teima en gobernar de costas ao principio de transparencia” e “impide que Rianxo conte cun marco normativo máis xusto e democrático para a xestión das subvencións”.
“Seguiremos traballando para que se respecten os principios de control e fiscalización democrática dos fondos públicos e para que se impulse unha política de subvencións que beneficie de maneira real e xusta á nosa veciñanza”, conclúen.
