O IES Virxe do Mar de Noia celebrará este venres, 7 de marzo, a entrega do II Premio Mulleres VdM, un galardón creado para recoñecer e poñer en valor o traballo de mulleres destacadas que manteñen unha vínculo co centro. Nesta segunda edición, a homenaxeada será Yessica Muíños Reyes, exalumna do instituto e nai loitadora, quen recibirá o recoñecemento nun acto aberto ao público que terá lugar no centro ás 12:30 horas.
A directora do IES Virxe do Mar, Miriam López, subliñou a importancia deste premio, explicando que “buscamos visibilizar o traballo da muller na sociedade, recoñecendo a aquelas con vinculación ao centro e favorecendo dende a comunidade educativa novos referentes femininos”.
Yessica Muíños Reyes destaca pola súa loita en defensa das persoas que padecen atrofia muscular espinal (AME), unha enfermidade que lle foi diagnosticada ao seu fillo pouco despois do seu nacemento. A pesar do prognóstico inicial, que limitaba a esperanza de vida do neno a apenas 24 meses, a súa loita e dedicación permitiron superar moitos obstáculos, chegando recentemente a finalizar o ciclo de ensinanza infantil.
O acto de entrega do premio contará coa presenza da premiada, da directora do centro, da xefa de estudos Eva Núñez e do vicedirector Fernando Vigo. Ademais, asistirá Rosita Paz, galardoada na edición anterior, xunto con familiares, amizades e veciñanza de Noia. A cerimonia incluirá unha actuación musical a cargo de dous grupos de alumnado do instituto e concluirá coa colocación dunha placa conmemorativa en honra da premiada nun espazo destacado do centro.
