O Auditorio do Centro Cultural e Xuvenil de Muros vai dar acollida este sábado 8 de marzo á representación do espectáculo O dragón de ouro, de Sarabela Teatro, a partir das 20.30 horas e a un prezo na billeteira de 3,50 euros, con posibilidade de facermos a reserva en liña.
Sinopse
Nun edificio de varios pisos, nalgún lugar de Europa, as vidas de diferentes personaxes entrelázanse: un mozo chinés sen permiso de residencia, un ancián nostálxico, unha neta embarazada, un home recentemente abandonado, un tendeiro misterioso e dúas azafatas que xantan no restaurante O dragón de ouro. Entre o real e o simbólico, a obra explora a desesperación, a identidade e a loita pola supervivencia.
Récord nos XXIX Premios María Casares
O Dragón de Ouro acaba de converterse na peza con maior número de nominacións nos XXIX Premios de Teatro María Casares, con 14 candidaturas, incluíndo Mellor Espectáculo.
A concelleira de Cultura de Muros, Caridad González, destaca: “É unha honra para o noso concello contar cunha das mellores pezas da actualidade. O dragón de ouro non só destaca pola súa proposta innovadora, senón tamén polo impacto que está a ter no panorama teatral galego”.
