O Concello de Muros fai un chamamento “á reflexión e a concienciación” polo 8M, Día Internacional da Muller. “Temos que seguir avanzando e non podemos permitirnos dar pasos cara atrás como sociedade”, asegurou Maruxa Martínez, concelleira de Igualdade de Muros, coincidindo coa presentación da axenda municipal deste 8M.
“É moi importante que as nenas e os nenos tomen conciencia do que é a igualdade e por iso poñemos o foco nos centros de ensino”, engadiu Laura Rivadeneira, concelleira de Ensino.
A programación comeza este sábado con Antes que a memoria esqueza, unha homenaxe ás mulleres do serradoiro no local social de Surribos, Abelleira, organizada pola Asociación de Veciños A Ostreira coa colaboración do concello.
Haberá tamén un obradoiro sobre sensibilización e prevención da violencia machista no IES Fontexería e no IES As Insuas, e contacontos teatralizados para o CEIP Ramón de Artaza, o CEIP Ricardo Tobío, o CEIP de Louro e a Escola de Educación Infantil de Muros.
A programación continuará cun Café Feminista para reflexionar sobre o impacto dos roles de xénero na saúde e un coloquio sobre menopausia saudábel.
