A Casa da Cultura de San Pedro de Muro, en Porto do Son, acolle o vindeiro 5 de abril unha actividade formativa de baile e música tradicionais que porá o foco, tamén, na improvisación oral galega. Trátase dun Obradoiro de Muiñeira, Xota e Regueifa, que ser impartido por Montse Rivera, en horario de 16.30 a 21.00 horas. Será organizado por Sonora Asociación Cultural, coa colaboración do Concello de Porto do Son. As prazas son limitadas, polo que as persoas interesadas en participar deberán poñerse en contacto coa asociación a través das redes sociais ou da conta de correo asociacionsonora@gmail.com.
Montse Rivera é mestra de baile tradicional galego en diversas agrupacións, e tamén ten un longa experiencia docente en música e teatro, ademais de ser unha experta na tradición oral galega. Foi integrante (xunto a Felisa Segade, Mercedes Rodríguez, Patricia Segade, Ana Rodríguez e Rosario Rodríguez) dunha das máis sobranceiras agrupacións musicais galegas durante máis de tres décadas: Leilía. Tamén foi fundadora do grupo Pescelán, xunto con Mercedes Peón.
