O programa Alimentes de Gadis segue adiante na provincia da Coruña, con máis de 6.600 estudantes do Barbanza, A Coruña e Ferrolterra, participando durante este curso escolar na iniciativa.
O obxectivo principal do plan é “fomentar hábitos de alimentación saudábel e sostíbel”, ensinando aos nenos e nenas a identificar os alimentos adecuados e a comprender a importancia da dieta equilibrada desde a nenez. A primeira fase do programa céntrase nas aulas, onde se traballan os contidos interactivos que ofrece a plataforma Alimentes Dixital. O foco ponse agora no calendario de visitas aos supermercados para que os estudantes, acompañados de monitores formados en nutrición e educación ambiental, percorran as diferentes seccións dos puntos de venda, con especial atención ás de produto fresco: peixaría, carnicería, froitas e verduras, lácteos etc. A clave, sinalou a cadea alimentaria galega, é mostrar cales son as mellores opcións que teñen ao seu alcance, facendo fincapé nos produtos locais e de tempada, e no apoio aos provedores de proximidade.
A plataforma dixital segue operativa para que docentes e alumnos poidan continuar traballando ata o fin do curso escolar nas súas 13 unidades didácticas. Textos, vídeos e fichas interactivas baseadas na cadea dos alimentos desde a orixe: lonxa, agro, gandería, almacéns, chegada á tenda, froitería, peixaría, lineal, caixas, fogares, reciclaxe e separación de residuos. Este ano, explica Gadis, o”s contidos ambientais son máis amplos e diversificados, con información referida ao cambio climático, o ciclo da auga ou a agricultura sostíbel”.
A unidade sobre o Prato Alimentes ten un enfoque claramente nutricional, debido a que se indican as proporcións e as categorías adecuadas dos alimentos que se deben consumir, segundo establece o Prato de Harvard. Quen finalice este itinerario interactivo, recibirán un premio de Gadis: un kit de Prato Alimentes. Ademais, sortearanse 5 packs de tablets entre todos os centros educativos.
