Entre a medianoite e as 19 horas deste venres, o 112 Galicia rexistrou un total de 83 incidencias relacionadas coas condicións meteorolóxicas adversas, a práctica totalidade (76) a partir do mediodía. O vento foi o principal protagonista, causando a maior parte das intervencións. As tipoloxías máis repetidas foron a presenza de árbores ou pólas nas vías de circulación (27 casos), a caída doutros obxectos (18) e as actuacións dos servizos de emerxencia para previr riscos (15), como a retirada de elementos desprendidos das fachadas dos edificios ou do mobiliario urbano.
Por provincias, Pontevedra foi a máis afectada, con 32 incidencias, seguida da Coruña (27), Lugo (16) e Ourense (6). Entre os concellos con máis incidencias destacan Lugo, Vigo e Vilagarcía, con catro casos cada un, mentres que Guitiriz, Poio, Pontevedra e Vilanova contabilizaron tres.
Ante esta situación, reiteramos a importancia de adoptar medidas de autoprotección. Durante a fin de semana manterase activa unha alerta amarela por vento en terra, que afectará practicamente a todo o litoral da comunidade.
