Xa comezou a conta atrás para a IV edición do Trail Cova da Bruxa, organizado polo Club Serres Runners coa colaboración do Concello de Muros, un evento deportivo que este ano bateu o seu récord de participación con máis de 1.100 persoas inscritas en todas as categorías. A proba será este domingo, 30 de marzo, a partir das 09:30 horas desde o Instituto As Ínsuas de Serres.
“Gañaron o premio ao mellor evento na I Gala do Deporte de Muros e este ano estou convencido de que mellorarán en todos os aspectos, desde a participación á organización, polo que quero agradecer o gran traballo do Club Serres Runners”, asegurou o concelleiro de Deportes, Damián Torea. Pola súa banda a alcaldesa María Lago sinalou que “en só catro anos, o Cova da Bruxa é un dos trails de referencia en Galicia, con 1.100 corremontes que desfrutarán do deporte e da natureza este domingo en Serres”.
Na presentación participaron Félix Rebollido (presidente de Serres Runners); Damián Torea; Paula Cernadas e Mónica Rodríguez, directivas do club; María Lago, e os directivos David Seijas e Álvaro Piñeiro.
Nesta edición, o trail puntúa para o Ranking Galego de Trailrunning da Federación Galega de Atletismo como proba G1; no Mini para as categorías Sub18 e Sub20, e no Trail Longo para as categorías Sub23, Absoluto e Máster.
O Concello agradeceu ademais o traballo na proba da Brigada de Obras Municipal, Protección Civil de Muros, GES, Garda Civil e Policía Local.
