A Asociación Boirense de Empresas (ABE) pon en marcha a campaña Ola Primavera! co obxectivo de incentivar as compras nos establecementos locais a través de promocións, sorteos e actividades especiais. A iniciativa, que se desenvolverá do 24 de marzo ao 6 de abril, busca “ofrecer vantaxes adicionais aos clientes e potenciar o comercio de proximidade”, sinalou a patronal boirense.
Premios e incentivos para os clientes
A campaña contará cun atractivo sorteo especial, no que os clientes que rexistren os seus tíckets de compra en www.abe.gal participarán para gañar unha paga mensual de 100€ ata decembro, sumando un total de 900€ en bonos ABE. O sorteo celebrarase o 7 de abril.
Gran Festa de Compras – Sábado 5 de abril
Como broche final da campaña, o sábado 5 de abril organizarase unha xornada especial con diversas actividades para animar as compras:
-Ruleta da Sorte. Cada cliente que presente un tícket superior a 10€ das compras realizadas o venres 4 e o sábado 5, en calquera dos 208 negocios asociados, poderá xirar a ruleta e optar a premios directos como imáns abridores, ambientadores para coche, neceseres, cuncas ou cordóns para chaves.
-Flocos (palomitas) gratis. Todos os participantes na ruleta recibirán tamén unha bolsa de flocos de millo.
-Carpa ABE: A ABE instalará unha carpa (haima) no centro da vila onde os clientes poderán trocar os seus tíckets polas tiradas na ruleta e recoller a súa caixa de flocos.
Un comercio vestido de primavera
Durante a campaña, os establecementos adheridos estarán adobiados con carteis en forma de flor, “creando un ambiente primaveral e festivo que fará máis atractiva a experiencia de compra”, explicaron dende a patronal.
Presentación do novo catálogo de premios ABE
Ademais, dentro das actividades da campaña, a ABE presentará o mércores 2 de abril ás 13.45 horas, un novo catálogo de premios, cunha imaxe renovada e novas recompensas. Para celebralo, os clientes que rexistren os seus tíckets os días 4 e 5 de abril acumularán o dobre de puntos para trocar por premios.
Unha aposta pola dinamización do comercio local
A campaña Ola Primavera! busca reforzar o comercio de proximidade e premiar a fidelidade dos clientes. Desde a ABE, convidan a toda a cidadanía a participar e gozar desta iniciativa que “traerá premios, diversión e vantaxes exclusivas para os compradores de Boiro”.
