No marco dos actos do 8M, Día Internacional da Muller, o Concello de Rianxo e a empresa galega eSports Lua Gaming organizaron unha mesa redonda co alumnado do IES Félix Muriel coa finalidade de falar sobre a muller na nova industria dixital. A cita, celebrada no Auditorio de Rianxo no mediodía deste 6 de marzo, foi inaugurada polo alcalde Julián Bustelo, quen lembrou a importancia de reivindicar as importantes contribucións pasadas, presentes e futuras das mulleres aos ámbitos científico-tecnolóxicos, ámbitos tradicionalmente copados polos homes pero nos que cómpre derrubar barreiras para garantir a igualdade e o pleno desenvolvemento persoal e investigador das mozas.
No acto as relatoras falaron sobre como afecta ás súas vidas profesionais o feito de seren mulleres nun eido tan específico como o do entretemento dixital, as redes sociais, o gaming e a industria dos videoxogos. A cita contou coa presenza de Concepción González, directora de Desenvolvemento na empresa de creación de videoxogos Electronic Arts; Paula Quintela, creadora de contido e xogadora de, entre outros, Valorant; Raquel PerryMCQueen, creadora de contido e social media na Liga de Videoxogos Profesional; e Lucía Otero Serramito, alumna do IES Félix Muriel de Rianxo e integrante do grupo de Igualdade.
